Danimarkanın Helsinqor şəhərində Avropa Parodontologiya Federasiyasına üzv olan 37 ölkənin iştirakı ilə Federasiyanın Baş Assambleyası keçirilib. Beynəlxalq tədbirdə ölkəmizi Azərbaycan Parodontologiya Cəmiyyətinin prezidenti, Səhiyyə Nazirliyi Əziz Əliyev adına Azərbaycan Dövlət Həkimləri Təkmilləşdirmə İnstitutunun stomatologiya və üz-çənə cərrahiyyəsi kafedrasının dosenti, parodontoloq Cavid Əhmədbəyli təmsil edib.

Bu barədə Aztibb.az-a Səhiyyə Nazirliyindən məlumat verilib.

Baş Assambleyanın gündəliyində əsas məsələlərindən biri Federasiyanın 2026-cı ildə keçiriləcək növbəti “Perio Master Clinic” konfransı olub. Bu konfransa ev sahibliyi etmək uğrunda mübarizə Bakı və Finlandiyanın Helsinki şəhərləri arasında aparılıb.

1000-dən çox mütəxəssisin iştirakı nəzərdə tutulan beynəlxalq konfransın 2026-cı ilin 6-7 mart tarixlərində Azərbaycanda Bakı Konqres Mərkəzində keçirilməsi Avropa Parodontologiya Federasiyasına üzv olan ölkələrinin gizli səsverməsi nəticəsində təsdiq olunub.

Təşkilat komitəsinə sədrlik Cavid Əhmədbəyliyə, elmi komitənin sədri vəzifəsi isə İspaniyanın Madrid Komplutense Universitetinin professoru Mariano Sanza həvalə olunub.

Qeyd edək, ki Azərbaycan Müstəqil Dövlətlər Birliyinə daxil olan respublikalar arasında Avropa Parodontologiya Federasiyasının sıralarına tamhüquqlu üzv olaraq qoşulan ilk ölkədir.