Səhiyyə Nazirliyinin Orqan Donorluğu və Transplantasiyası üzrə Koordinasiya Mərkəzi ilə Mərkəzi Gömrük Hospitalı arasında əlaqələri möhkəmləndirmək, qarşılıqlı fəaliyyət prosedurlarını razılaşdırmaq məqsədilə görüş keçirilib.

 

Gömrük Hospitalından Aztibb.az-a verilən məlumata  görə, görüşdə orqan transplantasiyası sahəsində fəaliyyətin təkmilləşdirilməsi ilə bağlı fikirlər səsləndirilib, iş prosesində yaranan suallara aydınlıq gətirilib. Həmçinin qarşılıqlı əlaqələrin bundan sonra da yüksək səviyyədə davam etdirilməsi barədə razılığa gəlinib.

 

Görüşdə Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev, Səhiyyə Nazirliyi Orqan Donorluğu və Transplantasiyası üzrə Koordinasiya Mərkəzinin İdarə Heyətinin sədri Yeganə Abbasova, sədr müavini Azər Dəmirov, Mərkəzi Gömrük Hospitalı Orqan Transplantasiyası şöbəsinin rəisi Mircəlal Kazımi, həkim-transplantoloq Kamran Beydullayev, həkim-nefroloq Elnur Fərəcov, Dövlət Gömrük Komitəsi Tibbi Xidmət İdarəsinin Hüquq şöbəsinin baş inspektoru Şahlar Misgərli, Tibbi Xidmət İdarəsinin Mərkəzi Hospitalında Transplantasiya işinin təşkili üzrə koordinator Azad Əhmədov, Orqan Donorluğu və Transplantasiyası üzrə Koordinasiya Mərkəzinin Mərkəzi Gömrük Hospitalı üzrə koordinatoru Hümmət Əhmədov iştirak ediblər.