4 ürək qapağı mədəciklərin girişində və çıxışında yerləşir, qanın doğru istiqamətdə axınını təmin edir. Normal vəziyyətlərdə qapaqlar bir istiqamətli rolunu oynayaraq, qanı doğru yönəldir və geri axının qarşısını almış olur.

Aztibb.az xəbər verir ki, bu barədə Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev ürək qapaq xəstəliklərinin müalicəsi ilə bağlı məlumat verərəkən deyib.

Uzman həkim bildirib ki, ürək qapaq xəstəlikləri zamanı qapaqlar ya tam açılmır, ya da bağlanmır. Qapaq xəstəlikləri çatışmazlıq və daralma şəklində olur. Qapaqların çatışmazlığı qanın geri qayıtmasına səbəb olur, daralmaları isə çıxmasını çətinləşdirir.

"Ürək qapaq xəstəlikləri müalicə edilə biləndir!", - deyən Cabir Gülmalıyev qeyd edib ki, qapaq xəstəliyi ciddi problem yaratmırsa, o zaman cərrahi müdaxilə tələb olunmur. Ancaq ürəyin nasos qabiliyyəti təsirlənirsə, ürək qapağının təmiri və ya dəyişdirilməsi tələb oluna bilər.

Onun sözlərinə görə, müalicədə bərpa əsas tədbirdir və bu məqsədlə valvuloplastika, annuloplastika, kommisurotomiya, mexaniki və ya bioloji qapaqlarla əvəzetmə həyata keçirilə bilər. Müalicə üsulunun seçimində xəstəliyin gedişi və xarakteri nəzərə alınır. Kəskin və ağır dərəcəli qüsurlarda əməliyyat ilk seçimdir.