"Şəki Rayon Mərkəzi Xəstəxanası" publik hüquqi şəxsin akt zalında Ümummilli Lider Heydər Əliyevin 100 illiyi ilə əlaqədar tədbir keçirilib.

Xəstəxanadan Aztibb.az-a bildirilib ki, əvvəlcə Ümummilli Lider Heydər Əliyevin və Azərbaycanın ərazi bütövlüyü uğrunda şəhid olan Vətən övladlarının xatirələri bir dəqiqəlik sükutla yad edilib.

Tədbiri giriş sözü ilə açan müəssisənin direktoru Məcid Əliyev Ulu Öndərin təhsil, mədəniyyət və səhiyyə sahələrində həyata keçirdiyi uğurlu layihələrdən, dahi liderin böyük xilaskarlıq missiyasından danışıb.

Məcid Əliyev bildirib ki, müstəqillik dövründə Ümummilli Liderimiz Heydər Əliyevin rəhbərliyi ilə həyata keçirilən islahatlar səhiyyə sahəsində inkişafın əsasını qoydu, maddi-texniki bazanın yaxşılaşdırılması və kadr potensialının gücləndirilməsi istiqamətində görülən işlər yeni perspektivlər müəyyənləşdirdi.

Sonra xəstəxananın müalicə işləri üzrə müavini - baş həkim Arzu İlyaslı xalqımızın Ümummilli Lideri Heydər Əliyevin Azərbaycan tarixində ictimai-siyasi həyatın müxtəlif sahələrində rolundan bəhs edib. O, Ulu Öndərin səhiyyə və tibb sahələrinin inkişafına xüsusi diqqət yetirdiyini bildirib. Qeyd edib ki, Heydər Əliyevin Azərbaycana rəhbərliyi illərində respublikada həkim kadrlarının və təbabət alimlərinin hazırlığı yüksək vüsət alıb, yeni elmi mərkəzlər açılıb, təbabət üzrə elmi–tədqiqat institutlarının fəaliyyəti canlandırılıb.