TƏBİB-in dəstəyi, Azərbaycan Kardiologiya Cəmiyyəti və Azərbaycan Reanimatoloqlar və Anestezioloqlar Cəmiyyətinin birgə təşkilatçılığı ilə “Kardiologiyada təcili hallar” mövzusunda konfrans keçirilib.

 

Aztibb.az TƏBİB-ə istinadla xəbər verir ki, tədbirdə TƏBİB-in İcraçı direktorunun müavini Anar İsrafilov çıxış edərək kardiologiya sahəsində görülən işlər barədə iştirakçıları məlumatlandırıb. O, kəskin ürək xəstəlikləri səbəbindən ölüm faizinin yüksək olduğunu qeyd edərək, konfransın maarifləndirici rol oynadığını vurğulayıb.

 

Tədbirdə Bakı Şəhəri Təcili və Təxirəsalınmaz Tibbi Yardım Stansiyasının 215 təcili tibbi yardım həkimi ilə birlikdə, ümumilikdə kardioloq, anestezioloq və reanimatoloq ixtisasları üzrə 450 həkimin kardiologiya sahəsində maraqlı məruzələri dinlənilib.

 

Konfrans zamanı 25 tibb bacısına EKQ-nin oxunması barədə məruzələr söylənilib, müxtəlif ürək xəstəlikləri zamanı “Best Practice” təlimləri keçirilib.

Qeyd edək ki, Azərbaycan Kardiologiya Cəmiyyəti tərəfindən həkimlərin elmi-praktiki biliklərinin artırılması, əhaliyə göstərilən tibbi xidmətin keyfiyyətinin yüksəldilməsi və ölkəmizdəki səhiyyənin inkişafına töhfə vermək məqsədilə bu cür tədbirlərin davamlı keçirilməsi planlaşdırılır.