Sumqayıt Tibb Mərkəzinin (STM) 6 nömrəli Ailə Sağlamlıq Mərkəzində (ASM) mülki müdafiə məşqi təşkil olunub.

 

STM-dən Aztibb.az-a bildirilib ki, "Fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə olunmasının təşkili" mövzusunda keçirilən mülki müdafiə məşqində 6 nömrəli ASM-in baş həkimi Leyla Qafarova çıxış edərək bildirib ki, məşqin keçirilməsində məqsəd rəhbər heyətə və işçilərə fövqəladə hadisələrin nəticələri aradan qaldırılarkən xilasetmə və digər təxirəsalınmaz işlərin təşkili və operativ olaraq yerinə yetirilməsi üzrə praktiki vərdişlər aşılamaqdır.

 

Baş həkim L. Qafarova şərti siqnalı verərək, məşqin başlanmasını elan edib.

 

Mülki müdafiə məşqi 4 siqnal üzrə həyata keçirilib.

 

İlk siqnalda zəlzələ nəticəsində 6 nömrəli ASM-in binasında dağıntılar və tələfatın olduğu bildirilib.

 

İkinci siqnalda baş vermiş zəlzələnin təsirindən Sumqayıt şəhər Etilen-polietilen zavodunda 5 tonluq xlor çəninin dağılaraq ətrafa yayıldığı və nəticədə kimyəvi zəhərlənmələrin olduğu qeyd olunub.

 

Üçüncü siqnal əsasında həyata keçirilən mülki müdafiə məşqində bildirilib ki, Hacı Zeynalabdin qəsəbəsinin "Kosmonavtlar" yaşayış massivində malyariya infeksion xəstəliyinin yayılması aşkarlanıb.

 

Sonuncu siqnalda binanın elektrik xətlərində yaranmış qısaqapanmadan yanğın baş verdiyi vurğulanıb.

 

Çıxış edən xəstəxananın Mülki müdafiə qərargahının üzvləri hər 4 halda təhlükələrin aradan qaldırılması istiqamətində həyata keçirilən tədbirlərdən geniş bəhs ediblər.

Sonda məşqin təhlili aparılıb.

 

Qeyd edək ki, mülki müdafiə məşqində STM-in Mülki müdafiə bölməsinin mütəxəssisi Hicran Sərkərova da iştirak edib.