Səhiyyə Nazirliyi Elmi-Tədqiqat Mamalıq və Ginekologiya İnstitutunda (ETMGİ) 31 mart 1918-ci il azərbaycanlılara qarşı törədilmiş soyqırımının 105-ci ildönümü ilə əlaqədar tədbir keçirilib.

 

İnstitutdan Aztibb.az-a bildirilib ki, əvvəlcə soyqırımı qurbanlarının xatirəsi bir dəqiqəlik sükutla yad edilib.

 

Tədbirdə müəssisənin direktoru, professor Cəmilə Qurbanova bildirib ki, 1918-ci ilin martında ermənilər Bakı şəhərində və Bakı quberniyasının müxtəlif bölgələrində, eləcə də Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə azərbaycanlılara qarşı soyqırımı aktı törədiblər. Bu acı həqiqət təkcə soydaşlarımızın qətliamı ilə deyil, həm də tarixi ərazilərimizin müəyyən hissəsinin işğalı ilə nəticələnib.

 

Direktor qeyd edib ki, Ümummilli Lider Heydər Əliyevin tarixi Fərmanından sonra aparılmış araşdırmalar sayəsində bir çox yeni faktlar və sənədlər toplanıb.

 

Daha sonra İnstitutun YAP təşkilatının sədri, həkim mama-ginekoloq Ədalət Əliyev 31 Mart Soyqırımı Gününün həqiqətləri haqqında geniş məruzə ilə çıxış edib.