Bakıda Ümumdünya Vərəmlə Mübarizə Gününə həsr olunmuş konfrans keçirilib.

Aztibb.az-a bu barədə Səhiyyə Nazirliyindən məlumat verilib.

Tədbir Azərbaycan Respublikası Səhiyyə Nazirliyi, Ölkə Əlaqələndirmə Komissiyasının (CCM), Elmi-Tədqiqat Ağciyər Xəstəlikləri İnstitutunun və Azərbaycan Vərəm əleyhinə QHT Koalisiyasının birgə təşkilatçılığı ilə baş tutub.

Əvvəlcə “Stop TB Partnership” təşkilatının icraçı direktoru xanım Luçika Ditiunun konfrans iştirakçılarına ünvanladığı video-müraciət dinlənilib.

Müraciətdə qeyd olunub ki, vərəm xəstəliyi hazırda dünyada ən çox ölümə səbəb olan yoluxucu xəstəlikdir: “Hələ də hər gün 4000-4500 nəfər insan vərəmdən dünyasını dəyişir, onlardan 700-ü uşaqlardır. Vərəm hava yolu ilə ötürülən xəstəlikdir. Biz bütün səylərimizi birləşdirərək 2030-cu ilədək vərəmi tamamilə ləğv edə bilməsək də, ona son qoya bilərik, yoluxmanı dayandıra bilərik. Əminəm ki, Azərbaycan 2030-cu ilədək öz insan və maliyyə resurslarını səfərbər edərək vərəmə son qoymağı bacaracaq”.

Konfransda çıxış edən səhiyyə nazirinin müavini Nadir Zeynalov tədbir iştirakçılarını səhiyyə naziri Teymur Musayevin adından salamlayıb. Səhiyyə sahəsində ölkəmizin uğurlarını qeyd edən N.Zeynalov vurğulayıb ki, bir neçə gün öncə Ümumdünya Səhiyyə Təşkilatı (ÜST) Azərbaycanı “malyariyadan azad” ölkə kimi sertifikatlaşdırıb. Nazir müavini, həmçinin ölkəmizin vərəmlə mübarizə sahəsində də vacib addımlar atıldığını və beynəlxalq platformalarda bir çox ölkələrə nümunə olduğunu qeyd edib.