Mərkəzi Gömrük Hospitalında təcrübə keçən Səhiyyə Nazirliyinin 2 nömrəli Bakı Baza Tibb Kollecinin tələbələri üçün Dövlət Gömrük Komitəsinin Tibbi xidmət İdarəsinin Elmi-Təcrübi Tədris Mərkəzi tərəfindən hazırlanmış Fəaliyyət Planına uyğun olaraq növbəti təlim keçirilib.

 

Aztibb.az-a Mərkəzi Gömrük Hospitalından bildirilib ki, təlim zamanı Hospitalın Laboratoriya şöbəsinin mütəxəssisi Ceyranxanım Hacıyeva “Laborator müayinələrin keyfiyyətinin təmin olunmasında tibb bacısının rolu. Preanalitik mərhələnin qaydaları” mövzusunda təqdimatla çıxış edib. O, təlim zamanı laborator müayinələrin nəticələrinin tələbləri, müayinə səhvləri, nümunələrin identifikasiyası, qanalma təlimat və qaydaları, hemoliz, lipemiya və ikteriya barədə ətraflı məlumat verib.

 

Hospitalın Tibbi laboratoriyasının ISO 15189:2012 “Tibbi laboratoriyalar. Keyfiyyətə və səlahəyyətliliyə olan tələblər” beynəlxalq keyfiyyət standartına uyğun fəaliyyət göstərdiyini vurğulayan Ceyranxanım Hacıyeva müəssisədə preanalitik mərhələnin təşkili qaydalarını da diqqətə çatdırıb. 

 

Sonda o, tələbələri maraqlandıran sualları cavablandırıb.