Sumqayıt Tibb Mərkəzinin (STM) tabeliyində olan tibb müəssisələrində Tədbirlər Planına uyğun olaraq "Fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə olunmasının təşkili" mövzusunda rəhbər heyətin mülki müdafiə məşqləri keçirilir.

 

Aztibb.az-a STM-dən verilən xəbərə görə, növbəti məşq Uşaq Xəstəxanasında keçirilib. Xəstəxananın baş həkimi Məzahir Müzəffərov və kollektivin iştirak etdiyi mülki müdafiə məşqində STM-in Mülki müdafiə bölməsinin mütəxəssisi Cəmilə Hüseynova çıxış edərək bildirib ki, məşqin keçirilməsində məqsəd rəhbər heyətə və işçilərə fövqəladə hadisələrin nəticələri aradan qaldırılarkən xilasetmə və digər təxirəsalınmaz işlərin təşkili və operativ olaraq yerinə yetirilməsi üzrə praktiki vərdişlər aşılamaqdır.

 

M.Müzəffərov isə bu kimi məşqlərin tibb heyətinin mülki müdafiə sahəsində bilik və bacarıqlarının, eləcə də praktiki vərdişlərinin artırılmasında mühüm əhəmiyyət kəsb etdiyini vurğulayıb.

 

Baş həkim şərti siqnalı verərək, məşqin başlanmasını elan edib. Mülki müdafiə məşqi 4 siqnal üzrə həyata keçirilib.

 

İlk siqnalda zəlzələ nəticəsində xəstəxananın poliklinika şöbəsinin binasında dağıntılar və tələfatın olduğu bildirilib.

 

İkinci siqnalda baş vermiş zəlzələnin təsirindən Sumqayıt şəhər Etilen-polietilen zavodunda 5 tonluq xlor çəninin dağılaraq ətrafa yayıldığı və nəticədə kimyəvi zəhərlənmələr qeydə alındığı qeyd olunub.

 

Üçüncü siqnal əsasında həyata keçirilən mülki müdafiə məşqində bildirilib ki, əsasən baş vermiş zəlzələnin təsirindən Sumqayıt şəhər 9-cu mk/da içməli su xətləri dağılıb, çirkab su bir çox yerlərdə içməli suya qarışıb. Nəticədə şəhərdə infeksion xəstəliklərin baş verməsi epidemik xəstəliklərin yaranması və yayılması təhlükəsi yaranıb.

Sonuncu siqnalda xəstəxananın qazanxana yerləşən binasında qaz sızması nəticəsində partlayış olduğu vurğulanıb. Yaranan yanğın nəticəsində xəsarət alanların olduğu qeyd olunub.

 

Çıxış edən Mülki müdafiə qərargahının üzvləri hər 4 halda təhlükələrin aradan qaldırılması istiqamətində həyata keçirilən tədbirlərdən geniş bəhs ediblər.

Sonda məşqin təhlili aparılıb, gələcəkdə atılacaq addımlar diqqətə çatdırılıb.

 

Qeyd edək ki, mülki müdafiə məşqində STM-in Mülki müdafiə bölməsinin müdiri Zümrüd Süleymanova və bölmənin mütəxəssisi Hicran Sərkərova da iştirak edib.