Molekulyar Biologiya və Biotexnologiyalar İnstitutunun (MBBİ) əməkdaşları Elm günü münasibətilə Fəxri xiyabanda görkəmli alim, institutun yaradıcısı, akademik Cəlal Əliyevin məzarını ziyarət ediblər.

Aztibb.az-a MBBİ-dən verilən xəbərə görə, əməkdaşlar akademik Cəlal Əliyev məzarı önünə gül-çiçək dəstələri qoyublar.

AMEA-nın vitse-prezidenti, institutun baş direktoru, akademik İradə Hüseynova qeyd edib ki, bu gün Cəlal müəllimin ziyarətinə onun tələbələri ilə yanaşı, həm də gənc alim və magistrantların da gəlməsi Cəlal Əliyev məktəbinin uğurlarının bariz nümunəsidir.

Akademik İradə Hüseynova görkəmli alimin Azərbaycanda biologiya elminin ən müasir istiqamətlərinin təşəkkülü və inkişafında, elmi nailiyyətlərin əldə edilməsində, Molekulyar Biologiya və Biotexnologiyalar İnstitutunun yaranmasında misilsiz xidmətlərindən söhbət açıb. O, akademik Cəlal Əliyevin elmi irsinin tələbələri tərəfindən davam etdirilməsinin zəruri olduğunu bildirib.