Molekulyar Biologiya və Biotexnologiyalar İnstitutunda 27 mart - Elm gününə həsr olunan tədbir keçirilib.

İnstitutdan Aztibb.az-a verilən xəbərə görə, tədbirdə AMEA-nın vitse-prezidenti, müəssisənin baş direktoru, akademik İradə Hüseynova Elm günü münasibətilə əməkdaşları təbrik edib. O, Azərbaycan Milli Elmlər Akademiyasının yaradıldığı günə təsadüf edən bu günün elmlə məşğul olan hər kəsin, bütövlükdə Azərbaycan elmi ictimaiyyətinin bayramı olduğunu vurğulayıb.

Daha sonra institutun Populyasiya genomiksi laboratoriyasının müdiri, b.ü.f.d., dosent Nurməmməd Mustafayev “İnsanın antropogenezi, miqrasiyaları və genetik biomüxtəlifliyi” və həmin laboratoriyanın kiçik elmi işçisi Zərintac Rüstəmova “Qədim DNT. Müasir insan genomuna qədim hominidlərin inteqrasiyası” mövzusunda məruzələrlə çıxış ediblər.

Məruzələrdə müasir insana gətirib çıxaran təkamül prosesindən, təkamüldə xüsusi rolu olan hominidlərdən, qədim insanların mirqrasiyaları və qarışmalarından, genetik biomüxtəlifliyindən, qədim DNT, onun ayrılması zamanı yaranan problemlərdən, müasir insan genomuna neandertal və Denisov adamı adlanan hominidlərin inteqrasiyasından, təkamül prosesində mühüm əhəmiyyət kəsb edən bir sıra genlərdən danışılıb.