Ağrıyan nahiyəyə və şişlərin üzərinə isti qoymaq olmaz. Pasiyentlər bəzən ağrıyan nayihəyə isidici kompress, isti daş qoyur, isti su vannası qəbul edir və müxtəlif qızdırıcı mazların istifadəsinə üstünlük verirlər. Demək olar ki, bir çoxları daimi olaraq isidiciyə (qrelka) üstünlük verirlər.

 

Aztibb.az xəbər verir ki, bu barədə Mingəçevir Şəhər Mərkəzi Xəstəxanasının Poliklinika şöbəsinin həkimi, terapevt İlham Əliyev məlumat verib.

 

Həkim bildirib ki, bəzi hallarda (qrelka) istifadə sağlamlığa ziyan vura bilər. Belə ki, səbəbi bilinməyən qarın ağrıları, tromboflebit, qanaxmalar zamanı isidicidən istifadə etmək olmaz. İstənilən orqanda bəd və ya xoş xassəli şişlər, kistlər ola bilər:

 

"Qeyd edilən bu səbəblərdən yaranan ağrının aradan qaldırılması üçün həkimə müraciət etmək əvəzinə, həmin nahiyəyə isidici qoymaqla mövcud olan şişlər daha da aktivləşdirilə bilər. Həmçinin qaraciyər, böyrək, uşaqlıq və yumurtalıq üzərinə diaqnozdan xəbərsiz isidici qoymaq məsləhət deyil. Ona görə də ilk növbədə həkiminizə müraciət edib, yaranan ağrının səbəbini öyrənmək lazımdır".