Oğuz Rayon Mərkəzi Xəstəxanasında Ümumdünya Vərəmlə Mübarizə Gününə həsr olunan tədbir keçirilib.

Rayon Xəstəxanasından Aztibb.az-a verilən xəbərə görə, tədbirdə inzibati işlər üzrə müavin İradə Məmmədova Ümumdünya Səhiyyə Təşkilatının qərarı ilə hər il martın 24-nün Ümumdünya Vərəmlə Mübarizə Gününü qeyd edilməsindən, 1882-ci ildə alman mikrobioloq Robert Koxun ilk dəfə vərəmin törədicilərini kəşf etməsindən danışıb. O, 1905-ci ildə alimin tibb sahəsində Nobel mükafatına layiq görüldüyünü bildirib. 

Daha sonra çıxış edən ftiziatr Mərziyyə Lətifova vərəmin hava-damcı yolu ilə yayılan xəstəlik olduğunu, insan orqanizminə tənəffüs yolları, qida, dəri vasitəsi və sair yollarla daxil olduğunu, onu törədən mikrobların uzun müddət yaşadığını söyləyib. Bildirib ki, xəstəliyə qab-qacaq, pal-paltar, dəsmal və digər məişət təması nəticəsində yoluxmaq mümkündür.

O, vərəmin mikobakteriyaları ilə törədilən, vaxtında və düzgün müalicə aparılmadıqda sağlamlığın itirilməsinə gətirib çıxaran infeksion xəstəlik olduğunu deyib. M.Lətifova ağciyər vərəminə daha çox rast gəlindiyini qeyd edib.