Oruc tutarkən qidalanma və yuxu rejimindəki dəyişikliklər ürək xəstələrinin vəziyyətinə təsir edə bilər. Bu səbəbdən oruc tutmaq istəyən ürək xəstələri, ilk növbədə, həkimləri ilə məsləhətləşməlidirlər.

Bu barədə Aztibb.az-a Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev məlumat verib.

Həkimin sözlərinə görə, ürək xəstəliyinin dərəcəsinə görə əks göstəriş olmazsa, həkim nəzarəti ilə ürək xəstələri də oruc tuta bilər:

"Hansı ürək xəstələrinin oruc tutması çox risklidir?

Son 1 ildə yeni infarkt keçirənlər
Ürək xəstəliyinə bağlı nəzarətsiz şikayətləri olanlar
Çoxlu dərman istifadəsi tələb edən ürək çatışmazlığı olanlar
Nəzarətsiz hipertenziya (yüksək təzyiq) xəstələri
Ürək qapağı protezi və ya insult riskinin artması səbəbindən qan duruldan dərmanlardan istifadə edən insanların oruc tutmağı sağlam deyil!"

Cabir Gülmalıyev qeyd edib ki, ürək xəstələri oruc tutarkən aşağıdakılara diqqət etməlidirlər:

Ramazan ayında adekvat və balanslı qidalanmaya diqqət yetirilməlidir;
Yeməklər iftar və imsakda iki əsas yemək, iftardan sonra isə 1-1,5 saat ara ilə iki qəlyanaltı şəklində təşkil edilməlidir;
İftarda bir boşqab yemək yedikdən sonra ən azı 10-15 dəqiqə fasilə verməlisiniz;
Xəstələr gündəlik həyatlarında diqqət etdikləri duz və su qəbulu məhdudiyyətlərinə davam etməlidirlər;
Xüsusilə qaynadılmış yeməklərə üstünlük verilməli, qovrulmuş, hisə verilmiş və qızardılmış qidalardan uzaq durmaq lazımdır.