Naxçıvan Muxtar Respublikası Ağciyər Xəstəlikləri Dispanseri publik hüquqi şəxsin həkim briqadası tərəfindən Sədərək rayonunda 24 mart - Ümumdünya Vərəmlə Mübarizə Gününə həsr olunmuş tibbi aksiya və seminar keçirilib.

Bu barədə Aztibb.az-a Naxçıvan Səhiyyə Nazirliyindən məlumat verilib.

Tibbi aksiyada flüoroqrafik müayinədən keçirilən 65 rayon sakinindən 20-si həkim ftiziatr müayinəsindən, 10-u həkim-ftiziatr-pediatr müayinəsindən keçirilib. Müayinədən keçənlərdən 5-nə mantu sınağı qoyulub, 2-nin isə bəlğəm analizi götürülüb. Müayinələrdən keçirilmiş dispanser qeydiyyatda olan 10 xəstədən 4-ü isə lazımi dərman preparatları ilə təmin olunub.

Aksiya zamanı, həmçinin ixtisaslı həkimlər tərəfindən rayon əhalisi ilə profilaktik söhbətlər də aparılıb.

Daha sonra Sədərək Rayon Mərkəzi Xəstəxanasında seminar keçirilib. Seminarda Naxçıvan Muxtar Respublika Ağciyər Xəstəlikləri Dispanseri publik hüquqi şəxsin həkimləri iştirak ediblər.

Seminarı giriş sözü ilə Sədərək Rayon Mərkəzi Xəstəxanası publik hüquqi şəxsin baş həkimi Kəmalə İbrahimova açıb. Sonra Ağciyər Xəstəlikləri Dispanserinin baş həkimi Günay Quliyeva “Vərəm xəstəliyinin yayılma yolları”, Dispanserin həkim-ftizatrı İlqar Rzayev “Uşaqlarda vərəm xəstəliyi”, həkim-ftiziatr Məmmədəli Ələkbərov isə “Vərəm xəstəliyinin aşkarlanması” mözusunda çıxışlar ediblər.

Sonda seminar iştirakçılarının sualları cavablandırılıb.