"Medic School Training Center” və “Abşeron Rayon Mərkəzi Xəstəxanası" publik hüquqi şəxs tərəfindən xəstəxananın həkim və orta tibb heyəti üçün “Tənəffüs və Ürək Dayanmalarda Təməl Həyata Dəstək və Təcilli Tibbi Vəziyyətlərdə Mavi Kod Xidmətinin Təşkili” tədbirləri üzrə Amerika Ürək Assosiasiyasının BLS protokolu üzrə təlim keçirilib.

Abşeron Rayon Mərkəzi Xəstəxanasından Aztibb.az-a verilən xəbərə görə, təlimdə Amerika Ürək Assosiasiyasının beynəlxalq sertifikatlı təlimçiləri körpələrdə və böyüklərdə huşun qiymətləndirilməsi, ürək dayanmalarında CPR (ürək ağciyər reanimasiya) tədbirləri, AED (avtomatik xarici defibrilyator) cihazından istifadə qaydaları, effektiv komanda işi, tənəffüs dayanmalarında ilkin müdaxilələr, döş ağrılarının idarə olunması və s. mövzular üzrə iştirakçılara məlumat veriblər.

Tibb işçilərinin bilik və bacarıqlarının təkmilləşdirilməsi məqsədi ilə keçirilən təlimdə iştirakçılar tərəfindən maraqla qarşılanan intensiv praktiki bacarıqlarını daha da təkmilləşdirmək üçün protokollara cavab verən xüsusi tibbi avadanlıqlardan istifadə olunub.

Sonda “Medic School Training Center” təlim mərkəzi tərəfindən Abşeron Rayon Mərkəzi Xəstəxanasına təşəkkürnamə, iştirakçılara isə sertifikatlar təqdim edilib.