Sumqayıt Tibb Mərkəzinin tabeliyində olan 5 nömrəli Ailə Sağlamlıq Mərkəzində (ASM) maarifləndirici seminar keçirilib.

Aztibb.az-a STM-dən verilən məlumata görə, seminarda ASM-in ailə həkimi pediatr Səbinə Musayeva "Suçiçəyi xəstəliyi. Əlamətləri və müalicə yolları" mövzusunda çıxış edib.

S.Musayeva bildirib ki, suçiçəyi dünyada ən çox yayılmış infeksiyadır. Qeyd edib ki, infeksiya yalnız insanlarda xəstəlik törədir və hava-damcı yolu ilə, nadir hallarda isə anadan bətnində olan uşağa ötürülür.

O, infeksiyanın müalicə üsullarından və bu sahədə mövcud olan protokollardan danışıb.

Qarşılıqlı fikir mübadiləsi şəraitində keçən seminarda iştirakçıları maraqlandıran suallar cavablandırılıb.

Qeyd edək ki, seminarda 5 nömrəli ASM-in baş həkimi Zeynəb Süleymanova da iştirak edib.