USAID/Azerbaijanın dəstəyi ilə ÜST-nin ekspert missiyası seçilmiş xəstəxanalarda Xəstəxananın Təcili Yardım Şöbəsinin Qiymətləndirilməsi Alətinin tətbiqi ilə qiymətləndirmə prosesinə başlayıb.

Aztibb.az ÜST-ə istinadla xəbər verir ki, missiya Respublika Klinik Xəstəxanası və Şamaxı Rayon Mərkəzi Xəstəxanasına səfər edərək təcili və təxirəsalınmaz tibbi yardım və radiologiya şöbələri, həmçinin laboratoriya, palatalar və əməliyyat otaqlarına baxış keçirib.

Missiyanın məqsədi ölkədə təcili yardım xidmətinin imkanlarını qiymətləndirmək, bu sahədəki əsas boşluqları, habelə təkmilləşdirilməli olan sahələri müəyyən etmək və təkmilləşdirmə planı hazırlamaqdır.

Qeyd edək ki, qiymətləndirmə aləti fevralın 23-də ÜST ekspertləri və milli səhiyyə sistemindəki tərəfdaşlarımızın iştirakı ilə keçirilən görüşdə təqdim edilib. Ümumilikdə 4 sahəni əhatə edən qiymətləndirmə prosesi 3 mərhələdə Bakı və Sumqayıt şəhərləri, o cümlədən Şamaxı rayonundakı 9 dövlət tibb müəssisəsində martın 19-dək keçiriləcək.
Qiymətləndirmə missiyası USAID-in dəstəyi ilə Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB-lə əməkdaşlıqda həyata keçirilən “Azərbaycanda pandemiyaya cavab tədbirləri” layihəsi çərçivəsində fəaliyyət göstərir.