TƏBİB-in tabeliyində fəaliyyət göstərən “Yeni klinika” tibb müəssisəsində növbəti tibbi seminar keçirilib.

 

Klinikadan Aztibb.az-a bildirilib ki, seminarda həkim-infeksionist İbrahim Rufullayev xəstəxanaya yatdıqdan 48-72 saat sonra, xəstəxanadan evə buraxıldıqdan 10 gün ərzində meydana gələn xəstəxanadaxili infeksiyalar və həmin infeksiyaların müşahidəsinə dair təqdimatla çıxış edib.

 

O, xəstəxanadaxili infeksiyalara stasionar müalicə alan pasiyentlərin 5-10 faizində, Reanimasiya şöbəsində olan pasiyentlərin təqribən 20-30 faizində rast gəlindiyini bildirib.

 

Həkim-infeksionist infeksiyaların risk faktorları (insan orqanizminə bağlı olaraq və mikrobial faktorlar) haqqında da məlumat verib. Məruzəçi xəstəxanadaxili infeksiyaların risk faktorları arasında yaş, metabolik pozulmalar, immunsupressiv dərmanlar, travma, yanıq və artmış antibiotik istifadəsinin (flora dəyişikliyi, dirəncli patogenlər) olduğunu qeyd edib.

 

İnfeksiyaların yayılması və müşahidəsi haqqında geniş müzakirələrin aparıldığı seminar sual-cavab sessiyası ilə yekunlaşıb.