Mərkəzi Gömrük Hospitalında “Psixotrop maddələr, yeni növ sintetik narkotik vasitələr, hallüsinogenlər və prekursorlar” mövzusunda təlim keçirilib.

Aztibb.az-a Hospitaldan verilən xəbərə görə, təlimdə Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev “Narkotik vasitələr və psixotrop maddələr: müasir dünyanın qlobal çağırışı” mövzusunda təqdimatla çıxış edub. O, yeni sintetik narkotiklər, psixoaktiv maddələrin növləri, onların insan orqanizmində yaratdığı fəsadlar və bu təhlükələrlə mübarizə yollarından bəhs edib. Həmçinin narkotiklərin istifadəsinin struktur dəyişikliyi, opium qrupuna daxil olan narkotik maddələr, dərman preparatlarının tərkibində olan narkotik vasitələr, eləcə də bu preparatların satışı qaydaları, bəzi yayılmış narkotik vasitələrin xüsusiyyətləri, təsirləri və yaratdıqları fəsadlar barədə ətraflı məlumat verib.

Daha sonra Mərkəzi Gömrük Hospitalının həkim-psixiatrı, tibb xidməti baş leytenantı İradə Ramazanova “Çağdaş dövrdə psixotrop dərmanların yaratdığı problemlər” mövzusunda təqdimatla çıxış edərək mövzu ilə əlaqəli aktual məsələr barədə danışıb.

Təlimin sonunda İsmayıl Əfəndiyev və İradə Ramazanova iştirakçıları maraqlandıran sualları cavablandırıblar.