Sumqayıt Tibb Mərkəzinin (STM) tabeliyində olan 3 nömrəli Ailə Sağlamlıq Mərkəzi (ASM) orta ümumtəhsil məktəblərində maarifləndirici profilaktik söhbətləri davam etdirir.

STM-dən Aztibb.az-a bildirilib ki, növbəti belə profilaktik söhbət Sumqayıt şəhər Mətləb Quliyev adına 3 nömrəli məktəbin yuxarı sinif şagirdlərinin iştirakı ilə keçirilib.

3 nömrəli ASM-in ailə həkimi pediatr Səbinə Abbasquluzadə "Qohum evliliyi və erkən nikahın fəsadları" mövzusunda çıxış edib.

S.Abbasquluzadə şagirdlərə mövzu ilə bağlı ətraflı məlumat verib, qohum evliliklərinin və erkən nikahların yaratdığı fəsadlardan danışıb.  Bildirib ki, ölkə qanunlarına əsasən 18 yaşını tamamlamayan hər bir şəxs uşaq sayılır, 18 yaşdan əvvəl həyata keçirilən evliliklər erkən evlilik hesab olunur və qanun pozuntusu sayılır.

Vurğulayıb ki, erkən nikahlar sonradan bir çox problemlərə yol açır.

Sonda şagirdləri maraqlandıran suallar cavablandırılıb.