Heydər Əliyev Mərkəzində "Bir ömür yolu" şüarı altında xüsusi qayğıya ehtiyacı olan insanlar üçün 5-ci yubiley "Fərqli Fərdlər" konqresi keçirilib.

Bu barədə Aztibb.az-a TƏBİB-dən məlumat verilib.

Bildirilib ki, tədbir TƏBİB-in dəstəyi, “Caspian Event Organisers” şirkətinin təşkilatçılığı ilə reallaşıb.

Konqresdə çıxış edən TƏBİB-in İcraçı direktorunun müavini Anar İsrafilov fərqliliyi olan şəxslərin sosial müdafiəsinin gücləndirilməsinin ölkə Prezidenti İlham Əliyevin siyasi strategiyasının əsas istiqamətlərindən biri olduğunu bildirib.

A.İsrafilov respublikamızda reabilitasiya mərkəzləri, reabilitasiya xəstəxanaları, sağlamlıq imkanları məhdud uşaqların reabilitasiyası ilə məşğul olan sanatoriyaların fəaliyyət göstərdiyini diqqətə çatdırıb. 

İcraçı direktorun müavini əlavə edib ki, son zamanlar autizm, uşaq serebral iflici, daun sindromu kimi diaqnozlar, həmçinin kiçik yaşda çox ciddiyə alınmayan, zaman keçdikcə valideynlər üçün daha böyük problemə çevrilən hiperaktivlik və diqqət əksikliyi kimi hallar artıb.

Tədbirdə, həmçinin inkişaf özəllikləri olan insanların uşaqlıq dövründə tədqiqatı və erkən müdaxilə, autizmli insanlarda qidalanma pozuntusu, bullinq və məktəbə inteqrasiyası, inklüziv işə qəbul, perspektivlər və digər məsələlər ətrafında da fikir mübadiləsi aparılıb.