Ümumdünya Səhiyyə Təşkilatının (ÜST) Azərbaycan Nümayəndəliyi və TƏBİB-in birgə əməkdaşlığı ilə Naftalan şəhərində TƏBİB-in həssas əhali qrupları ilə iş üzrə koordinatorlarına psixososial dəstəyin təməl prinsipləri üzrə təlim keçirilib.

TƏBİB-dən Aztibb.az-a bildirilib ki, təlim Avropa İttifaqının (Aİ) maliyyə dəstəyi ilə həyata keçirilən “Psixi sağlamlıq xidmətlərinin münaqişədən sonrakı dövrdə koordinasiyası və transformasiyası” layihəsi çərçivəsində gerçəkləşib. Sözügedən layihə Aİ və ÜST-nin Azərbaycana davamlı dəstəyinin tərkib hissəsidir.

Təlimin əsas məqsədi kömək üçün müraciət edən vətəndaşların ehtiyaclarının müəyyənləşdirilməsi və müvafiq olaraq yönləndirilməsi mövzusunda koordinatorların bilik və praktiki bacarıqlarının artırılması olub. Təlim mövzularında təməl psixososial dəstək bacarıqları, sosial işin əsas prinsipləri və effektli ünsiyyət bacarıqları əhatə olunub.

Təlimdə klinik depressiya, təşviş pozuntuları, posttravmatik stress pozuntusu haqqında, eləcə də yardım üçün müraciət edən şəxslərə düzgün yanaşmanın təməl prinsipləri barədə sessiyalar yer alıb. Məlumatların mənimsənilməsi və praktiki bacarıqların artırılması məqsədilə rol oyunları və qrup işləri təşkil olunub.