Aztibb.az-ın "Həkimlərimizi tanıyaq!" rubrikasının budəfəki qonağı Qobustan Rayon Mərkəzi Xəstəxanasının həkimi İlfəddin Əliyevdir.

İlfəddin Abdulla oğlu Əliyev 13 dekabr 1965-cü ildə Salyan rayon Yuxarı Xalac kəndində anadan olub. 1989-1995-ci illərdə Azərbaycan Tibb Universitetinin II Müalicə-proflaktika fakültəsində təhsil alıb. 1996-cı ilin dekabr ayından 2001-ci ilin sentyabr ayına qədər 877 nömrəli hərbi hissənin tibb məntəqəsində həkim vəzifəsində xidmət edib.

O, 2001-2005-ci illərdə Türkiyə Respublikası Gülhanə Hərbi Tibb Akademiyasına 4 il müddətinə ixtisasartırma kursu üzrə ezam edilib. Ezamiyyətdən sonra 181 nömrəli hərbi hissənin tibb təminatına cavabdeh zabit (Maddi Texniki Təminat bölməsinin zabiti-Q4 bölməsi) vəzifəsinə təyin edilib. 2006-cı ildə 877 nömrəli hərbi hissənin tibb təminatı xidmətinə cavabdeh zabit vəzifəsində xidmət edib. 2012-2016-cı illərdə Silahlı Qüvvələrin Təlim və Tədris Mərkəzində Döyüşün Maddi Texniki Təminatı silsiləsinin baş müəllimi işləyib. 2016-cı ilin mart ayından Azərbaycan Tibb Universitetinin Hərbi Tibb fakultəsinin tədris bölmə rəisi vəzifəsində çalışıb. 2019-cu ilin fevral ayında yaş məhdudiyyətinə görə ordu sıralarından ehtiyyata buraxılıb. Hazırda Qobustan Rayon Mərkəzi Xəstəxanasında təcili və təxirəsalınmaz tibbi yardım üzrə həkim vəzifəsində çalışır.