Bakıda “İnfeksion və qeyri-infeksion hepatitlərin müalicə və diaqnostikasına müasir yanaşma” mövzusunda elmi konfrans keçirilib.

 

Mərkəzi Gömrük Hospitalından Aztibb.az-a verilən xəbərə görə, konfrans Azərbaycan Respublikası Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzinin, Mərkəzi Gömrük Hospitalının, “Azəri Toksikoloqlarının Dərnəyi” İctimai Birliyinin, “Azərbaycan Qastroenteroloqlar və Hepatoloqlar” İctimai Birliyinin, “Azərbaycan İnfeksion Xəstəlikləri və Kliniki Mikrobiologiya Cəmiyyəti”-nin və Materia Medica şirkətinin birgə təşkilatçılığı ilə baş tutub.

 

Tədbirdə Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev çıxış edərək yoluxucu xəstəliklərlə mübarizənin qlobal səviyyədə mütəmadi xarakter daşımasının vacibliyini vurğulayıb. O, hepatitlərin erkən aşkarlanması istiqamətində həyata keçirilən maarifləndirici tədbirlərin, eləcə də hepatit xəstələrinin hərtərəfli diqqət və qayğı ilə əhatələnməsinin dövlət səviyyəsində prioritet məsələlərdən olduğunu bildirib. İ.Əfəndiyev konfransın müvafiq ixtisaslı həkimlər arasında təcrübə mübadiləsinə böyük töhfə verəcəyinə inamını ifadə edib.

 

Daha sonra Milli Məclisin Səhiyyə Komitəsinin sədr müavini, Dövlət Gömrük Komitəsi Tibbi Xidmət İdarəsinin Elmi-Təcrübi və Tədris Mərkəzinin rəisi, t.e.d. Rəşad Mahmudov və Kliniki Tibbi Mərkəzin Yoluxucu xəstəliklər şöbəsinin müdiri, Hepatit Komissiyasının sədri Fərrux Sədirov çıxış edərək mövzu ilə bağlı fikirlərini bölüşüblər.

 

Fərrux Sədirov çıxışı zamanı “Hepatit Komissiyasının fəaliyyəti və Azərbaycanda mövcud vəziyyət” barədə konseptual məruzəsini təqdim edib.

 

Rəsmi açılış hissəsindən sonra elmi konfrans “İnfeksion hepatitlərin müalicə və diaqnostikasına müasir yanaşma” və “Qeyri-infeksion hepatitlərin müalicə və diaqnostikasına müasir yanaşma” panelləri ilə öz işini davam etdirib.