Bu gün tanınmış cərrah-onkoloq, Əməkdar həkim, Milli Onkologiya Mərkəzinin şöbə müdiri, t.ü.f.d. Niyazi Əsgərovun 60 yaşı tamam olur.
Aztibb.az xəbər verir ki, N.Əsgərov 1984-1990-cı illərdə Rusiyanın Vladivostok Dövlət Tibb Universitetində Müalicə-profilaktika fakültəsində təhsil alıb. 1990-1991-ci illərdə Rusiyanın Nefteyuqansk şəhərindəki Tyumen Tibb Akademiyasının Ümumi cərrahiyyə kafedrasında internatura keçib.
O, 1990-2003-cü illərdə Rusiyanın Tyumen vilayətinin Nefteyuqansk şəhərinin Mərkəzi Şəhər xəstəxanasında həkim-cərrah vəzifəsində çalışıb. 2003-2008-ci illərdə Leyla Şixlinskaya klinikasında cərrah işləyib. 2009-cu ildən Milli Onkologiya Mərkəzinin Abdominal onkologiya şöbəsinin müdiridir.
N.Əsgərov cərrahi onkologiya üzrə yüksəkixtisaslı mütəxəssisdir. Həkimin 100-dən çox elmi işi çap olunub. O, Rusiya, Türkiyə, Avstriya, Tacikistan, Qazaxistan, İtaliya və digər ölkələrdə keçirilən bir sıra elmi-praktiki konfranslarda, qurultaylarda iştirak edib.
“Azərbaycan Respublikasında Hepatopankreatoduodenal sahənin şişlərin kliniki və epidemioloji xüsusiyyətləri” mövzusu üzrə namizədlik dissertasiyasını müdafiə edərək tibb üzrə fəlsəfə doktoru alimlik dərəcəsinə layiq görülüb.
O, Rusiyanın Moskva, Sankt-Peterburq, Perm, Tyumen, Surqut, Belorusiyanın Minsk və Azərbaycanın Bakı şəhərində ixtisasartırma kurslarında olub. 13 noyabr 2001-ci ildə Tyumen vilayətinin Səhiyyə departamenti nəznində olan Attestasiya Komissiyasının qərarı ilə həkimə cərrahiyyə üzrə Ali ixtisas dərəcəsi verilib.
Tanınmış cərrah 1990-cı ildən laparoskopik cərrahiyyə ilə də məşğuldur. 1993-cü ilə kimi diaqnostik laparoskopiyalar, 1993-cü ildən isə laparoskopik cərrahiyyəyə başlayıb. Belə ki, öd daşı xəstəliklərində, öd kisəsinin poliplərində, bəd və xoş xassəli şişlərində 4000-dən artıq laparoskopik xolesistektomiya əməliyyatlarının icraçısıdır.
2012-ci ildən Milli Onkologiya Mərkəzində yeni texnoloji avadanlıqlar hesabına laparoskopik metodikani mədə-bağırsaq sisteminin cərrahiyyəsinə tətbiq edib.
2021-ci il 18 iyun tarixində Azərbaycan Respublikasında səhiyyə sahəsində səmərəli fəaliyyətlərinə görə dövlət başçısının Sərəncamı ilə "Əməkdar həkim" fəxri adına layiq görülüb.
