8 Mart - Beynəlxalq Qadınlar Günü Bakı Sağlamlıq Mərkəzində də qeyd olunub.
Mərkəzdən Aztibb.az-a verilən xəbərə görə, tədbirdə İcraçı direktor Asiman Həsənov əlamətdar gün münasibətilə kollektivin xanım nümayəndələrini təbrik edib, gələcək fəaliyyətlərində onlara uğurlar arzulayıb.
Daha sonra müasir dövrdə qadınlarımızın müstəqil Azərbaycanın inkişafına verdiyi töhfələrdən, onların səhiyyə sahəsindəki qazandığı uğurlardan bəhs olunub. Bildirilib ki, bu gün Azərbaycan qadını biliyi, istedadı, milli-mənəvi keyfiyyətləri ilə dünya qadınları arasında yüksək yer tutur.
Tədbirdə ölkəmizdə dövlət qadın siyasətinin əsasını qoyan ümummilli lider Heydər Əliyevin qadın şəxsiyyətinə böyük hörmətlə yanaşdığı, ölkə həyatının bütün sahələrində qadınlara xüsusi yer ayırdığı, onların hərtərəfli fəaliyyətinə geniş meydan verdiyi vurğulanıb.
Sonda mərkəzin xanım kollektivinə hədiyyələr təqdim olunub və xatirə şəkilləri çəkilib.