“Heydər Əliyev müasir Azərbaycan dövlətinin qurucusudur” mövzusunda tədbir keçirilib

07.03.2023 09:59

Yeni Azərbaycan Partiyası Saatlı rayon təşkilatı tərəfindən Saatlı Rayon Mərkəzi Xəstəxanası Ərazi Partiya təşkilatında “Heydər Əliyev müasir Azərbaycan dövlətinin qurucusudur” mövzusunda tədbir keçirilib.

Saatlı Rayon Mərkəzi Xəstəxanasından Aztibb.az-a bildirilib ki, əvvəlcə Ümummilli Lider Heydər Əliyevin və torpaqlarımızın azadlığı uğrunda canlarını qurban vermiş qəhrəman Vətən övladlarının əziz xatirəsi bir dəqiqəlik sükutla yad edilib.

Tədbiri giriş sözü ilə açan Yeni Azərbaycan Partiyası Saatlı rayon təşkilatının sədri Lütvəli Şıxəliyev bildirib ki, Prezident İlham Əliyevin Sərəncamı ilə 2023-cü il ölkəmizdə “Heydər Əliyev İli” elan olunub.

Rayon təşkilatının sədri Ulu Öndər Heydər Əliyevin parlaq və şərəfli həyat yolu, dövlətçilik fəaliyyəti, azərbaycançılıq ideologiyası, Azərbaycanın hər sahə üzrə inkişafı istiqamətində göstərdiyi əvəzsiz xidmətləri tədbir iştirakçılarının diqqətinə çatdırıb. Xalqımızın böyük oğlu, müasir Azərbaycan dövlətinin banisi və qurucusu Heydər Əliyevin həyat yolundan, Vətən qarşısında tarixi xidmətlərindən danışan Lütvəli Şıxəliyev deyib ki, Ulu Öndərin mənalı ömür yolunun hər anı, hər səhifəsi bugünkü və gələcək nəsillərə nümunə olacaq canlı və unudulmaz tarixdir. “Mənim üçün hər şeydən əziz mənim xalqımdır, mənim Vətənimdir, mənim torpağımdır”, - söyləyən Ulu Öndər Heydər Əliyev ömrünü bütövlükdə doğma Azərbaycanımızın çiçəklənməsinə, mənsub olduğu xalqın inkişafına sərf edib, bütün varlığı ilə sevdiyi Vətənini, xalqını, onun dövlətçiliyini tarixin çox çətin sınaq və imtahanlarından böyük məharətlə çıxarıb.

Lütvəli Şıxəliyev qeyd edib ki, Ümummilli Liderin uzaqgörən və düzgün siyasəti ölkə Prezidenti, Müzəffər Ali Baş Komandan İlham Əliyev tərəfindən layiqincə davam etdirilir. Dünya dövlətləri sırasında özünün qurub yaratdığı şah əsəri olan müstəqil Azərbaycan dövlətinə yaşamaq, əbədi var olmaq hüququ verib və hazırda bu müdrik siyasət də bizim xoşbəxt və firavan gələcəyimizi layiqincə təmin edir.

Görüşdə çıxış edən Saatlı Rayon Mərkəzi Xəstəxanası Publik Hüquqi şəxsin direktoru Pərvin Məmmədov bildirib ki, Azərbaycan xalqı öz böyük oğlu Heydər Əliyevi yalnız siyasi lider kimi deyil, həm də milli dövlətçilik ideologiyasının şəriksiz müəllifi kimi qəbul edir. Çünki Heydər Əliyev siyasi kursundan kənarda Azərbaycan dövlətçiliyi yoxdur və elə bütün bunlara görə Azərbaycan xalqının da xoşbəxtliyi ondadır ki, məhz 1993-cü ilin iyununda ölkə rəhbərliyinə yenidən dünya şöhrətli siyasətçi, dünyəvi və hüquqi dövlət quruculuğu sahəsində zəngin biliyə, böyük dövlətçilik təcrübəsinə malik, hadisələri qabaqcadan görməyi və qətiyyətlə adekvat tədbirlər həyata keçirməyi bacaran bir şəxsiyyət gəldi.

Tədbirdə Çingiz Fətullayev, Nicat Mutallimov çıxış edərək bildiriblər ki, Azərbaycan xalqı və dövləti var olduğu müddətdə əvəzedilməz şəxsiyyət olan Ulu Öndər Heydər Əliyevin əziz xatirəsi də xalqımızın qəlbində var olacaq, daim hörmətlə anılacaqdır. Nicat Mütəllimov qeyd edib ki, Ümummilli Lider Heydər Əliyevin ölkənin səhiyyə sferasını əhatə edən köklü islahatların həyata keçirilməsində rolunu və səhiyyənin inkişafı üçün müstəsna xidmətlərini böyük ehtiramla yad etmək məqsədilə, Azərbaycan Respublikasında 2023-cü ilin "Heydər Əliyev İli" elan edilməsi haqqında Azərbaycan Respublikası Prezidentinin 29 sentyabr 2022-ci il tarixli 3494 nömrəli Sərəncamını, eləcə də dahi lider Heydər Əliyevin 100 illik yubileyinin dövlət səviyyəsində qeyd olunmasını nəzərə alaraq "Tibbi Ərazi Bölmələrini İdarəetmə Birliyi" publik hüquqi şəxsin İcraçı direktoru 2023-cü il "Heydər Əliyev İli" nin qeyd olunması ilə bağlı Tədbirlər Planının təsdiq edilməsi haqqında 01 mart 2023-cü il tarixdə Əmr imzalamışdır. "Heydər Əliyev İli"nin qeyd edilməsi ilə bağlı Tədbirlər Planının 2023-cü ildə həyata keçirilməsində Saatlı RMX-nın rəhbər və kollektivi fəal iştirak edəcəkdir.