Həkim-nefroloq Barat Yusubov böyrək daşı olanlar üçün qidalanma məsləhətlərini bölüşüb. 

 

Aztibb.az həkimin feysbuk hesabına istinadla xəbər verir ki, B.Yusubov böyrək daşı zamanı tərkibində oksalat maddəsi olduğu üçün xüsusən çərəz, ispanaq, və kakao istifadəsini azaltmaq lazım olduğunu qeyd edib.

 

"Heyvani protein, kalsium və xüsusilə də pomidorda olan oksalat maddəsi böyrəklərin fəaliyyətinə mənfi təsir göstərir. Xüsusilə böyrək daşı olanlar protein qəbuluna diqqət etməlidirlər. Misal olaraq : Bir yemək qəbulu zamanı heyvani protein qəbul edirsinizsə (hər hansı ət və ya ət məhsulu), digər yemək qəbulu zamanı lifli qidalara üstünlük verin, əgər səhər çox miqdarda pendir yeyirsinizsə, günorta ət xörəyi yeməyin", - deyə həkim əlavə edib. 

 

B.Yusubovun sözlərinə görə, kifayət qədər su içildikdə sidiyin miqdarı artır və bu da maddələr mübadiləsinə və süzülmə prosesinə yaxşı təsir edir. Beləliklə, böyrəklərdə kristallaşma azalır, mövcud olan kiçik kristallar orqanizmdən ifraz olunur. Az su içildiyində isə süzülmə miqdarı azalır və daş əmələ gəlməsinə səbəb olan kalsium, oksalat və oxşar maddələr kristallaşmağa başlayır, zaman keçdikcə daşa çevrilir:

 

"Böyrəklərinizdə daş əmələ gəlməməsi üçün gündəlik olaraq 2 litrə yaxın su qəbul edin. Əgər siz 2 litr su içib, gündəlik o suyun bədəndən ifraz olmadığını, şişkinlik yaratdığı hiss edirsinizsə, su miqdarını azaltmalı və həkimə müraciət etməlisiniz"