Naxçıvan Muxtar Respublikası Səhiyyə Nazirliyinin təşkilatçılığı ilə Sədərək Rayon Mərkəzi Xəstəxanasında uşaqlar üçün tibbi aksiya keçirilib.

Naxçıvanın Səhiyyə Nazirliyindən Aztibb.az-a bildirilib ki, aksiyada Əziz Əliyev adına Naxçıvan Muxtar Respublikası Mərkəzi Uşaq Xəstəxanasının ixtisaslı həkim briqadası iştirak edib.

Aksiya zamanı pediatriya üzrə 215, nevrologiya üzrə 57, oftalmologiya üzrə 54, kardiologiya üzrə 37 olmaqla, ümumilikdə 363 rayon sakininə müayinə və müalicələr təşkil olunub. Xəstələrdə aşkar olunan diaqnozlara uyğun Sədərək Rayon Mərkəzi Xəstəxanasında dispanserizasiya işi aparılıb.

Yerində müayinə və müalicələri mümkün olan xəstələrin müayinə edilərək müalicəsi təmin edilib, daha dərin müayinəyə ehtiyacı olanlar isə Naxçıvan şəhərində uyğun xəstəxanalara yönləndirilib. Dərindən müayinəyə ehtiyac olan şəxslər barədə Rayon Mərkəzi Xəstəxanasının baş həkiminə məlumat verilib və müalicələrinin nəzarətdə saxlanılması haqqında Səhiyyə Nazirliyi tərəfindən tapşırıq verilib.