Sumqayıt Tibb Mərkəzinin (STM) tabeliyində olan tibb müəssisələrində Tədbirlər Planına uyğun olaraq "Fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə olunmasının təşkili" mövzusunda rəhbər heyətin mülki müdafiə məşqləri keçirilir.

STM-dən Aztibb.az-a verilən xəbərə görə, növbəti belə məşq Təcili Təxirəsalınmaz Tibbi Yardım Stansiyası şöbəsində (TTTYS) keçirilib.

Mülki müdafiə məşqi 4 siqnal üzrə həyata keçirilib.
İlk siqnalda zəlzələ nəticəsində Təcili Təxirəsalınmaz Tibbi Yardım Stansiyasının qarajında dağıntılar və tələfatın olduğu bildirilib. TTTYS-in həkimi Çiçək Cahangirova həyata keçirilən xilasetmə və təxliyyə işlərindən danışıb.

İkinci siqnalda isə baş vermiş zəlzələnin təsirindən Sumqayıt şəhər Etilen-polietilen zavodunda 5 tonluq xlor çəninin dağılaraq ətrafa yayıldığı və nəticədə kimyəvi zəhərlənmələr qeydə alındığı qeyd olunub. TTTYS-in həkimi Kamal Rzayev vurğulayıb ki, kimyəvi maddələrdən poliklinika şöbəsində zəhərlənənlər olub və onlar ağır vəziyyətdə münasib olan xəstəxanalara yerləşdirilib.

Üçüncü siqnal əsasında həyata keçirilən mülki müdafiə məşqində bildirilib ki, Hacı Zeynalabdin qəsəbəsinin "Kosmonavtlar" yaşayış massivində malyariya infeksion xəstəliyinin yayılması aşkarlanıb. TTTYS-in həkimi Nəzakət Əsədova ərazidə olan təhlükənin aradan qaldırılması ilə bağlı həyata keçirilən tədbirlərdən söz açıb.

Sonuncu siqnalda isə zəlzələ nəticəsində stansiyanın ikinci mərtəbəsində elektrik xətlərində yaranmış qısa qapanmadan yanğın baş verdiyi qeyd olunub. TTTYS-in həkimi Vüsalə Mikayılova bildirib ki, hadisə yerinə dərhal yanğınsöndürmə qüvvələri cəlb olunub. Yanğın zamanı xəsarət alanlar və tüstüdən zəhərlənənlər münasib olan xəstəxanalara yerləşdirilib.

Sonda məşqin təhlili aparılıb, gələcəkdə atılacaq addımlar diqqətə çatdırılıb.