Ümumdünya Səhiyyə Təşkilatı (ÜST) 3 mart tarixini Qulaq və Eşitmə Sağlamlığının Qorunması Günü kimi təyin edib.

Aztibb.az xəbər verir ki, həmin gün 2007-ci ildə ÜST tərəfindən qulaq və eşitmə qabiliyyətinin qorunması məqsədilə təsis edilib.

Beynəlxalq Qulaq və Eşitmə Gününün keçirilməsində əsas məqsəd ölkənin tibbi və könüllü təşkilatları ilə birlikdə eşitmə problemləri barədə və onların həlli istiqamətində əhalini maarifləndirməkdir. 

Eşitmə qabiliyyətini azaldan səbəblər çoxdur: qan-damar sistemi xəstəlikləri; infeksion xəstəliklər; travmalar (əsasən, məişət və nəqliyyat); toksiki təsirlər; ekoloji çirklənmələr; səs-küylər (telefon, mikrofonlar, səs gücləndirici cihazlar) və s. Həkimlərin rəyinə əsasən, baş verən karlıq və pis eşitmənin yarısını aradan qaldırmaq mümkündür.

Qabaqlayıcı tədbirlər sırasına əhalinin immunizasiyası, ana və uşağın sağlamlığının qorunması, əmək gigiyenasının tələblərinə əməl olunması daxildir.