TƏBİB-in İcraçı direktoru Vüqar Qurbanov Kuba Respublikasının ictimai səhiyyə naziri Xose Anxel Portal Miranda ilə görüşüb.
Aztibb.az-a TƏBİB-dən verilən məlumata görə, görüşdə iki ölkə arasında səhiyyə sahəsində əməkdaşlığın genişləndirilməsi, təcrübə mübadiləsi, kadr hazırlığı, ailə həkimi modelinin təkmilləşdirilməsi, biofarmasevtika istiqamətində birgə layihələrin həyata keçirilməsi imkanları müzakirə olunub.
TƏBİB-in İcraçı direktoru Vüqar Qurbanov 30 ildir Kuba ilə mövcud olan diplomatik əlaqələrin uğurla davam etdirildiyini bildirib. Qeyd edib ki, ötən gün Prezident İlham Əliyevin Kuba Respublikasının vitse-prezidenti Salvador Antonio Valdes Mesanın başçılıq etdiyi nümayəndə heyətini qəbul etməsi bunun bariz nümunəsidir.
İcraçı direktor son illər Azərbaycan və Kuba arasında səhiyyə sahəsində də ikitərəfli münasibətlərin dinamikasında fəallıq müşahidə edildiyini bildirib.
O, TƏBİB-in fəaliyyəti barədə ətraflı məlumat verərək ölkəmizdə pandemiya ilə mübarizə tədbirləri çərçivəsində Kuba ilə səmərəli əməkdaşlığa diqqət çəkib. V.Qurbanov COVID-19-a yoluxmuş şəxslərin müalicəsi üçün Kuba Respublikasından dəvət olunmuş 236 nəfərdən ibarət tibbi heyətin TƏBİB-in tabeliyindəki Kliniki Tibbi Mərkəz, Yeni Klinika və Binəqədi Tibb Mərkəzinin tabeliyində qurulmuş Abşeron Olimpiya İdman Kompleksində uğurla fəaliyyət göstərdiyini xatırladıb.
İcraçı direktor bundan sonra da Kuba ilə səhiyyə sahəsində yeniliklər, təcrübə mübadiləsi, tibb personalı üçün təlimlərin keçirilməsi istiqamətində əməkdaşlığın genişləndirilməsinin vacibliyini vurğulayıb.
Xose Anxel Portal Miranda isə öz növbəsində pandemiya ilə mübarizə çərçivəsində Kubanın 58 tibbi briqadasının 57 ölkəyə ezam olunduğunu, onlardan Azərbaycana ezam olunan həkimlərin TƏBİB-lə bağlı yüksək təəssüratla geri döndüyünü vurğulayıb. Eyni zamanda, nazir “Ailə həkimi” modelinin Azərbaycanda təkmilləşdirilməsi üçün Kubanın öz təcrübəsini bölüşməyə hazır olduğunu diqqətə çatdırıb.
Görüşün sonunda əməkdaşlıq üzrə texniki işçi qrupunun yaradılması qərara alınıb.
Qeyd edək ki, Kuba nümayəndə heyətinin tərkibində Kuba Respublikasının Xarici İşlər Nazirliyinin Avropa və Kanada İdarəsinin rəhbəri Cizela Qarsia Rivera, Kubanın ölkəmizdəki səfiri Karlos Enrike Valdes de la Konsepsyon təmsil olunublar.