Ulu Öndər Heydər Əliyevin 100 illik yubileyinə həsr olunmuş “Biomüxtəliflik və bioresurslar” mövzusunda elmi seminar keçirilib. 

Elm və Təhsil Nazirliyinin Botanika İnstitutundan (Bİ) Aztibb.az-a bildirilib ki, tədbir Ekologiya və Təbii Sərvətlər Nazirliyinin Bioloji Müxtəlifliyin Qorunması Xidməti, Azərbaycan Botaniklər Cəmiyyəti İctimai Birliyi və Bİ-nin birgə təşkilatçılığı ilə baş tutub.

Tədbirdə institutun baş direktoru, professor Səyyarə İbadullayeva seminarın təşkilində əsas məqsədin Ulu Öndər Heydər Əliyevin Azərbaycan təbiətində qoyduğu irsi gənc nəsillərə çatdırmaq olduğunu bildirib. Qeyd edib ki, hələ sovet hakimiyyəti illərində Azərbaycana rəhbərliyinin birinci dövründə görkəmli dövlət xadimi Heydər Əliyev respublikamızda təbii sərvətlərin qorunması, yaşıllaşdırma proqramlarının gerçəkləşdirilməsi sahəsində əhəmiyyətli addımlar atıb.

Baş direktor 2023-cü ilin "Heydər Əliyev İli" elan olunması barədə Prezident İlham Əliyevin imzaladığı sərəncamın əhəmiyyətinə toxunaraq, sərəncamın Ümummilli Liderin həyat və fəaliyyətinin daha dərindən araşdırılması, öyrənilməsi baxımından vacibliyini vurğulayıb: "Azərbaycan Respublikasının Nazirlər Kabinetinin 28 noyabr 2022-ci il tarixli Sərəncamının icrası ilə bağlı Azərbaycan botanik alimləri Azərbaycanın Qırmızı kitabının III nəşrini məhz Ulu Öndərin 100 illiyinə töhfə vermək arzusundadır".

Səyyarə İbadullayeva bildirib ki, respublikamızda 1117 cinsə aid 4961 növ bitki müəyyən edilib. Ərazi erməni təcavüzünə məruz qaldığı illərdə qiymətli ağac növlərindən ibarət 986 hektar dövlət meşə sahəsi, 710 hektar keçmiş kolxoz meşələri, 560 hektar arid meşə sahələri törətdikləri yanğınlar və dağıntılar nəticəsində ciddi ziyan görüb. Bütün bunlar Qarabağa və Zəngəzura Böyük Qayıdışdan sonra Azərbaycan alimlərinin qarşısında mühüm vəzifələr qoyur.

Daha sonra ekologiya və təbii sərvətlər nazirinin müavini, b.ü.f.d. Vüqar Kərimov, Elm və Təhsil nazirinin müşaviri Nicat Məmmədli, AMEA-nın vitse-perzidenti, akademik İradə Hüseynova, millət vəkili Kamilə Əliyeva, AMEA-nın müxbir üzvü Vaqif Novruzov, akademik Tariyel Talıbov və başqaları çıxış edərək tədbirin  bilomüxtəlifliyin qorunması və ekoloji problemlərin həlli istiqamətində qarşıya qoyulmuş bir sıra mühüm məsələlərin həllinə töhfələr verəcəyini bildiriblər.

İki gün davam edən seminarda əlaqədar institutlardan olan elmlər doktorları, fəlsəfə doktorları, aspirant və magistrantlar müxtəlif mövzularda məruzə və posterlə çıxış ediblər. Mövzular ətrafında geniş müzakirələr aparılıb.

Sonda seminarın aktiv iştirakçılarına sertifikat təqdim olunub.