Hindistanın Qandinaqar şəhərində Beynəlxalq Pediatriya Assosiasiyasının (IPA) 30-cu konqrensi və Hindistan Pediatriya Akademiyasının (PEDICON) 60-cı konfransı keçirilib.

Azərbaycan Pediatrlar Assosiasiyasınıdan (APA) Aztibb.az-a verilən xəbərə görə, Hindistan 46 ildən sonra ilk dəfə  “IPA 2023” konqresinə ev sahibliyi edib.

Beynəlxalq tədbirə 500-ə yaxın beynəlxalq nümayəndə, dünyanın aparıcı tibb jurnallarının redaktorları, həmçinin Ümumdünya Səhiyyə Təşkilatının xüsusi nümayəndələri qatılıblar.  Yerli və xarici pediatrlar qlobal səhiyyə mövzuları, o cümlədən yeni tədqiqatlar, innovasiyalar, qabaqcıl texnologiyalar və tibbi avadanlıqlar, pediatriyanın üzləşdiyi problemlər, onların həlli yollarını müzakirə ediblər.

Konqresdə Azərbaycan Pediatrlar Assosiasiyasının prezidenti, ATU-nun dosenti Təranə Tağı-zadə və Azərbaycan Pediatrlar Assosiasiyasının Beynəlxalq əlaqələr şöbəsinin rəhbəri, ATU-nun Tələbə Həmkarlar İttifaqı Komitəsinin sədri Qoşqar İsmayılov məruzə ilə çıxış ediblər.

Azərbaycanlı nümayəndələrin məruzələrində əsas mövzu genetik testlərin aparılmasında etik problemlərlər, eləcə də tədqiqat aparan şəxslərin xəstələrə etik yanaşmasına həsr olunub.

Həmçinin məruzələrdə Prezident İlham Əliyev və birinci xanım Mehriban Əliyevanın Azərbaycanda səhiyyə və uşaq sağlamlığına göstərdiyi diqqət və qayğıdan, ölkəmizdə səhiyyə sisteminin təkmilləşdirilməsi, vətəndaşların sağlamlığının təmin edilməsi istiqamətində atılan addımlardan, əhalinin müasir səhiyyə xidmətləri ilə təmin olunması yönündə icra olunan layihələrdən danışılıb.