Şəhid ailələrinə diqqət və qayğı dövlət siyasətinin əsas prioritet istiqamətlərindəndir. Bu məqsədlə Səhiyyə Nazirliyi tərəfindən mütəmadi olaraq şəhid ailələri üçün sanator-kurort və bərpa-müalicə xidmətləri təşkil edilir.
Səhiyyə Nazirliyinin Elmi-Tədqiqat Kardiologiya İnstitutundan Aztibb.az-a bildirilib ki, müəssisə tərəfindən Tərtər rayonunda şəhid ailələri və Vətən müharibəsi veteranları üçün növbəti tibbi-maarifləndirici aksiya keçirilib.
TƏBİB-in tabeliyindəki Tərtər Rayon Mərkəzi Xəstəxanasında baş tutan aksiya zamanı Tərtər, Ağdam və Bərdə rayonlarından olan 200-dən artıq şəhid ailəsi və Vətən müharibəsi veteranı ödənişsiz kardioloji tibbi müayinələrdən keçirilib. Onlar, həmçinin EXO KQ, EKQ, nevroloji və endokronoloji müayinə də olunublar.
Qeyd edək ki, aksiya Azərbaycan Respublikasının Səhiyyə Nazirliyi, TƏBİB, Tərtər İcra Hakimiyyəti, Tərtər Rayon Mərkəzi Xəstəxana və “Servier” dərman şirkətinin dəstəyi ilə keçirilib.