Azərbaycan xalqının tarixində ən qanlı səhifələrdən olan Xocalı soyqırımı erməni millətçilərinin və onların havadarlarının xalqımıza qarşı apardığı etnik təmizləmə siyasətinə xidmət edirdi.
Elm və Təhsil Nazirliyinin Biofizika İnstitutundan Aztibb.az-a verilən xəbərə görə, bu fikirləri institutun baş direktoru, AMEA-nın müxbir üzvü Oktay Qasımov müəssisədə Xocalı faciəsinin 31-ci ildönümü ilə əlaqədar keçirilən tədbir zamanı deyib.
O, xalqımızın qan yaddaşına əbədi həkk olan Xocalı faciəsini bütün insanlığa və bəşəriyyətə qarşı törədilmiş ən ağır cinayət adlandırıb. Baş direktor bu faciə ilə bağlı həqiqətlərin dünya ictimaiyyətinə çatdırılmasının, eləcə də qan yaddaşımızın unudulmaması üçün anım tədbirlərinin keçirilməsinin əhəmiyyətini vurğulayıb.
Daha sonra institutun Sənədlərlə iş şöbəsinin müdiri, Qadınlar şurasının sədri Əsmər Məmmədova çıxış edərək ermənilərin Xocalıda törətdikləri qanlı cinayətlərdən, Xocalı soyqırımının təfərrüatlarından, bu soyqırımın dünya xalqlarına tanıdılması istiqamətində görülən işlərdən danışıb. Bildirib ki, Prezident İlham Əliyevin diplomatik məharəti, Azərbaycan Ordusunun peşəkarlığı və xalqımızın Ali Baş Komandan ətrafında “dəmir yumruq” kimi birləşməsi sayəsində haqq-ədalət bərqərar olub.
