Səhiyyə Nazirliyinin Səhiyyənin İnformasiyalaşdırılması Mərkəzi tərəfindən Vahid Səhiyyə İnformasiya sisteminin “Elektron Epikriz” altsistemi hazırlanıb.

Nazirlikdən Aztibb.az-a verilən məlumatda bildirilir ki, yeni altsistem ölkə Prezidentinin müvafiq fərmanı ilə təsdiq edilmiş səhiyyənin transformasiyası təşəbbüsü çərçivəsində və rəqəmsal sağlamlıq vasitələrinin tətbiqinin genişləndirilməsi məqsədilə yaradılıb.

Göstərilən tibbi xidmətlərin effektiv informasiya dəstəyinin və keyfiyyətinin artırılması üçün hazırlanan “Elektron Epikriz”dən artıq səhiyyə işçiləri istifadə edə bilərlər.

Tezliklə “e-Səhiyyə” kabinetində və mobil tətbiqdə vətəndaşların istifadəsinə veriləcək sistem həkimin elektron imzası ilə təsdiqlənir. Çap edilmiş sənədin həqiqiliyini üzərindəki QR-kodu vasitəsilə yoxlamaq mümkündür.

Yeni altsistem vətəndaşların xəstəlik tarixlərindən çıxarışların vahid elektron reyestrinin yaradılması, aparılması və saxlanılmasını təmin edir, məlumat sorğuları əsasında fərdi tibbi məlumatların axtarışını və verilməsini standartlaşdırır. Bu, həm də xəstəliklə bağlı retrospektiv məlumatların olmaması səbəbindən həkim səhvi ehtimalını minimuma endirəcək.