Zaqatala Rayon Mərkəzi Xəstəxanasında Xocalı soyqırımının 31-ci ildönümünə həsr edilmiş anım tədbiri keçirilib.

 

Bu barədə Aztibb.az-a Rayon Xəstəxanasından məlumat verilib.

 

Əvvəlcə Xocalı hadisələri zamanı həlak olanların xatirəsi bir dəqiqəlik sükutla yad edilib.

Tədbirdə direktorun İnzibati məsələlər üzrə müavini Emil Rüstəmov bildirib ki, Xocalı faciəsi Ermənistan silahlı qüvvələrinin Azərbaycana təcavüzü zamanı doğma torpağının müdafiəsinə qalxmış xalqımızı sarsıtmaq, onun mübarizə əzmini qırmaq, Dağlıq Qarabağın Azərbaycanlı əhalisinin bir hissəsini məhv etmək niyyəti ilə törədilmiş silsilə, kütləvi qırğın aktlarından biri idi.

 

Daha sonra xəstəxananın İctimaiyyətlə əlaqələr üzrə mütəxəssisi Həcər Hacıyeva çıxış edərək erməni-rus hərbi birləşmələri tərəfindən törədilmiş Xocalı soyqırımını XX əsrin ən qanlı hadisəsi adlandırıb. O, Xocalı faciəsinin erməni millətçilərinin Azərbaycan xalqına qarşı yürütdüyü soyqırımı və etnik təmizləmə siyasətinin tərkib hissəsi olduğunu bildirib.

 

Həcər Hacıyeva bu faciəyə ilk dəfə hüquqi-siyasi qiymətin Ümummilli Lider Heydər Əliyev tərəfindən verildiyini qeyd edib. O, Xocalı soyqırımının dünya miqyasında tanıdılması istiqamətində həyata keçirilən dövlət tədbirlərindən və Heydər Əliyev Fondunun təşkilatçılığı ilə görülən işlərdən danışıb.