Mərkəzin direktoru Səkinə Sadıxova tədbirdə çıxış edərək xalqımızın qan yaddaşına əbədi həkk olmuş Xocalı faciəsindən danışıb. O, 1992-ci il fevralın 25-dən 26-na keçən gecə erməni silahlı birləşmələrinin sovet ordusunun 366-cı motoatıcı alayının köməyi ilə Xocalı şəhərini işğal edərək çoxlu sayda mülki əhalini, əsasən də uşaq və qadınları qətlə yetirdiyini diqqətə çatdırıb.

 

Amansız qətliamın miqyası və dəhşətləri barədə məlumat verən direktor ümummilli lider Heydər Əliyevin 1993-cü ildə siyasi hakimiyyətə qayıtdışından sonra Xocalı soyqırımına siyasi-hüquqi qiymət verildiyini bildirib.

 

O, Xocalı soyqırımının dünya miqyasında tanıdılması istiqamətində həyata keçirilən dövlət tədbirlərindən və Heydər Əliyev Fondunun təşkilatçılığı ilə görülən işlərdən danışıb. S.Sadıxova vurğulayıb ki, illərlə bu soyqırımı cinayəti əsl beynəlxalq hüquqi-siyasi qiymətini almasa da, Müzəffər Ali Baş Komandanımızın qətiyyətli siyasəti və rəşadətli Azərbaycan Ordusununn qəhrəmanlığı sayəsində 44 günlük Vətən müharibəsində qazanılan şanlı Zəfərlə tarixi ədalət bərpa edilib və şəhidlərimizin qanı yerdə qalmayıb.

Tədbirdə Təcili Tibbi Yardım Xəstəxanasının baş həkimi Rauf Sadıxov, Vərəm Xəstəxanasının baş həkimi Asif Quliyev, Ümumi şöbənin müdiri Aynur Həsənova və Xəstə xidmətləri şöbəsinin müdir müavini Nərgiz Cəmilzadə çıxış edərək Azərbaycan tərəfindən Xocalı faciəsi ilə bağlı həqiqətlərin beynəlxalq ictimaiyyətə çatdırılması və bu tip cinayətlərin beynəlxalq səviyyədə tanıdılması ilə bağlı zəruri tədbirlərin görüldüyünü bildiriblər.

 

Sonda Xocalı soyqırımı dəhşətlərini özündə əks etdirən videoçarx nümayiş olunub.