Laçın şəhərində Azərbaycan Respublikasının işğaldan azad edilmiş ərazilərində məsələlərin mərkəzləşdirilmiş qaydada həlli ilə bağlı yaradılmış Əlaqələndirmə Qərargahının İdarələrarası Mərkəzinin nəzdində fəaliyyət göstərən Ekoloji məsələlər üzrə İşçi qrupun iclası keçirilib.

AMEA-dan Aztibb.az-a verilən xəbərə görə, Akademiyanın vitse-prezidenti, akademik İradə Hüseynova İşçi qrupun iclasında çıxış edib.

Tədbirdən öncə Laçın rayonunun Sus kəndi ərazisində Həkəri çayına “Qırmızı kitab”a düşmüş çay qızılxallısı (qızılxallı forel) balıqları buraxılıb.

İclasda müvafiq qurumlar tərəfindən görülmüş işlər təqdimatları dinlənilib, müzakirələr aparılıb.

Akademik İradə Hüseynova çıxışında torpaqlarımızın işğaldan azad edilməsindən sonra Qarabağa “Elmin Böyük Qayıdışı” üçün şəraitin yarandığını, ötən dövr ərzində alimlər tərəfindən regionda bioloji və radioekoloji monitorinqlərin həyata keçirildiyini, torpaq və su resurslarının tədqiq edildiyin bildirib. Qeyd edib ki, monitorinq Laçın rayonunu da əhatə edib.

Laçın rayonunun bioloji müxtəlifliyi, flora və faunası, “Qırmızı kitab”a düşmüş və arealları içərisində Laçın rayonunun da olduğu növlər barədə məlumat verən vitse-prezident monitorinqlərin nəticələri ilə toplantı iştirakçılarını tanış edib.

O, Laçın rayonu ərazisində 2021-2022-ci illərdə bir neçə dəfə aparılmış radioekoloji monitorinqlərin nəticələri barədə də məlumat verib.