Azərbaycan Dünya Bankı ilə əməkdaşlığa böyük önəm verir. Səhiyyə sisteminin təkmilləşdirilməsi, rəqəmsallaşmanın və insan kapitalının inkişaf etdirilməsi ölkəmiz üçün prioritet məsələdir. Bunu nəzərə alaraq, Dünya Bankı ilə müxtəlif sahələrdə əməkdaşlıq Azərbaycanda qabaqcıl beynəlxalq təcrübənin tətbiqi baxımından mühüm əhəmiyyət kəsb edir.

Səhiyyə Nazirliyindən Aztibb.az-a verilən xəbərə görə, bu  fikirləri səhiyyə naziri Teymur Musayev Dünya Bankının Avropa və Mərkəzi Asiyanın İnsan İnkişafı üzrə regional direktoru Fadia Saadahla görüşü zamanı deyib.

Teymur Musayev qeyd edib ki, son zamanlar Səhiyyə Nazirliyinin Dünya Bankının missiyaları ilə görüşləri bu əlaqələrin inkişafına təkan verir.

Görüşdə Fadia Saadah təmsil etdiyi beynəlxalq təşkilatın fəaliyyət istiqamətlərindən danışıb. Bildirib ki, ölkəmizə səfərinin məqsədi insan kapitalının inkişafı ilə bağlı “Azərbaycan Respublikasının 2022-2026-cı illərdə sosial-iqtisadi inkişaf Strategiyası”nın həyata keçirilməsində Dünya Bankının Azərbaycan hökumətinə göstərdiyi potensial dəstəyin müzakirəsidir.

Sonda əməkdaşlıq perspektivləri və birgə layihələrin həyata keçirilməsinə dair müzakirələr aparılıb.