Lənkəran Rayon Mərkəzi Xəstəxanasında Xocalı soyqırımının 31-cu ildönümü ilə bağlı anım tədbiri keçirilib. 

Xəstəxanadan Aztibb.az-a bildirilib ki, əvvəlcə soyqırımı qurbanlarının əziz xatirəsi bir dəqiqəlik sukutla yad edilib.

Tədbirdə tibb müəssisəsinin direktoru Ağabala Kəlbiyev Xocalıda baş verənlərin XX əsrdə bəşəriyyətə qarşı törədilmiş ən dəhşətli cinayətlərdən biri olduğunu və xalqımızın yaddaşında dərin, sağalmaz iz buraxdığını vurğulayıb.

Direktor qeyd edib ki, Prezident, Müzəffər Ali Baş Komandan İlham Əliyevin müdrik siyasəti və sərkərdəlik məharəti sayəsində şanlı Ordumuz 44 günlük Vətən müharibəsində Qarabağı düşmən işğalından azad edərək Xocalı faciəsi qurbanlarının qisasını alıb. 

Tədbirdə digər çıxış edənlər bildiriblər ki, Xocalı faciəsi təsadüfi hadisə deyil, soyqırımı törətməklə ermənilər xalqımızı qorxutmaq, mübarizə əzmini qırmaq, tarixi torpaqlarımızın bir qisminin itirilməsi ilə barışmağa məcbur etmək istəyiblər. Vurğulanıb ki, dövlətimiz tərəfindən soyqırımın dünyada tanıdılması sahəsində mühüm addımlar atılır.