Şirvan Şəhər Mərkəzi Xəstəxanasında “Heydər Əliyev İli”nə həsr olunan “Zamanın fövqündə duran lider Heydər Əliyev“ mövzusunda tədbir keçirilib.

 

Xəstəxanadan Aztibb.az-a verilən məlumata görə, tədbiri giriş sözü ilə açan Şirvan ŞMX-nın dirktoru Kamil Əhmədov 2023-cü ilin “Heydər Əliyev İli ” elan olunması barədə Azərbaycan Respublikasının Prezidenti İlham Əliyevin imzaladığı Sərəncamın əhəmiyyətinə toxunub. O, sərəncamın Ulu Öndərin həyat və fəaliyyətinin daha dərindən araşdırılması, öyrənilməsi, təbliği, gələcək nəsillərə çatdırılması baxımından vacibliyini qeyd edib.

 

Kamil Əhmədov müasir müstəqil Azərbaycan dövlətinin memarı və qurucusu Heydər Əliyevin xalqımız və dövlətimiz qarşısındakı misilsiz xidmətlərindən danışıb. Vurğulayıb ki, Ulu Öndərin mənalı ömür yolunun hər anı, hər səhifəsi bugünkü və gələcək nəsillərə nümunə olacaq unudulmaz tarixdir.

 

Ümummilli lider Heydər Əliyevin təməlini qoyduğu mütərəqqi siyasi irsin Prezident İlham Əliyevin qətiyyətlə həyata keçirdiyini söyləyən direktor bildirib ki, milli qurtuluşdan başlanan Zəfər yolu xalqımızı tarixi Qələbə gününə qədər aparıb. Ulu Öndərin arzusunu, vəsiyyətini şərəflə yerinə yetirən Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində Qarabağımız düşmən işğalından azad edildi, ölkəmizin ərazi bütövlüyü bərpa olundu.

 

Sonra çıxış edən Keyfiyyətə nəzarətin idarəedilməsi komitəsinin rəhbəri Qalib Mirzəyev Ümummilli Lider Heydər Əliyevin Azərbaycanın siyasi-ictimai həyatında gördüyü işlərdən danışıb. Qeyd edib ki, Heydər Əliyev öz parlaq siyasi zəkası və istedadı sayəsində yeni Azərbaycanı, onun bugünkü gerçəkliklərini yaratmış və gələcəyə aparan yolları müəyyən edib. Məhz buna görə də Azərbaycan tarixinin 1969-cu ildən bəri yaşanan dövrü Heydər Əliyevin adı ilə sıx bağlıdır.