Avropa Xəstəliklərin Qarşısının Alınması və Nəzarət Mərkəzi (ECDC) Türkiyə və Suriyanın zəlzələdən zərər çəkmiş bölgələrində yoluxucu xəstəliklərin yayılması riskinin artdığına işarə edən açıqlama yayıb. 

Aztibb.az ECDC-yə istinadən xəbər verir ki, təşkilat zərərçəkənlərin məruz qaldığı çoxsaylı xəsarətlərin müalicəsinin çətinliyini qeyd edir. Yaxın iki-dörd həftə ərzində infeksion xəstəliklərin olması təhlükəsinin narahatlıq doğura biləcəyini və zəlzələ nəticəsində dağılmış bölgələrdə vəba xəstəliyinin baş vermə ehtimalının yüksək olduğunu bildirir. 

Bundan əlavə, ekspertlər zərərçəkmişlər və düşərgələrdə qalanlar üçün xoşagəlməz mənzərəni, orada hepatit A, rotavirus kimi xəstəliklərin, eləcə də respirator infeksiyaların yayılmasının mümkünlüyünü qeyd edirlər. 

Bildirilir ki, fəlakət zonasında yoluxucu xəstəliklərin yayılmasına səbəb təmiz, içməli suya çıxışın məhdudlaşdırılması, qeyri-adekvat sanitar-gigiyenik şərait, qidanın qeyri-kafi saxlanması və hazırlanması ola bilər.