Yeni Azərbaycan Partiyasının Sumqayıt şəhər təşkilatının təşkilatçılığı ilə Sumqayıtda “Heydər Əliyev İli” ilə əlaqədar konfrans keçirilib.

 

Sumqayıt Tibb Mərkəzindən (STM) Aztibb.az-a bildirilib ki, tədbirdə STM-in direktoru Səkinə Sadıxova, direktor müavinləri və tabeli tibb müəssisələrinin baş həkimləri də iştirak ediblər.

 

Konfransda STM-in direktor müavini Maisə İsmayılova “Heydər Əliyev müasir Azərbaycan səhiyyəsinin qurucusudur” mövzusunda çıxış edib. O, Azərbaycan Respublikası Prezidentinin müvafiq Sərəncamı ilə 2023-cü ilin ölkəmizdə “Heydər Əliyev İli” elan edilməsini tarixi hadisə adlandırıb. Məruzəçi Ulu Öndərin şanlı ömür yolundan iftixar hissi ilə bəhs edib, respublikamızın bu gün də Heydər Əliyev siyasi kursu əsasında inkişaf etdiyini diqqətə çatdırıb.

 

Direktor müavini ölkəmizdə səhiyyənin inkişafının və tibbi kadrların hazırlanmasının məhz Ulu Öndərin adı ilə bağlı olduğunu vurğulayıb, görkəmli şəxsiyyətin bu sahədə həyata keçirilən islahatlardan söz açıb.

 

Tədbirdə bir qrup partiya fəalı YAP Sumqayıt şəhər təşkilatı tərəfindən Fəxri fərmanlarla təltif edilib.

 

Təltif edilənlər arasında STM-in Təcili Tibbi Yardım Xəstəxanasının baş həkimi Rauf Sadıxov, Uşaq Xəstəxanasının Yoluxucu xəstəliklər şöbəsinin müdiri, Əməkdar həkim Sehri Babayev də var.