Oğuz Rayon Mərkəzi Xəstəxanasının həkim və orta tibb heyəti üçün “Tənəffüs və Ürək Dayanmalarda Təməl Həyata Dəstək və Təkmil Kardiovaskulyar Həyata Dəstək” tədbirləri çərçivəsində Amerika Ürək Assosiasiyasının BLS və ACLS protokolu üzrə təlim keçirilib.

Xəstəxanadan Aztibb.az-a bildirilib ki, təlim bu tibb müəssisəsi və "Medic School Training Center” tərəfindən təşkil olunub.

Təlimdə Amerika Ürək Assosiasiyanın beynəlxalq sertifikatlı təlimçiləri körpələrdə və böyüklərdə huşun qiymətləndirilməsi, ürək dayanmalarında CPR (ürək ağciyər reanimasiya) tədbirləri, AED (avtomatik xarici defibrilyator) cihazından istifadə qaydaları, tənəffüs dayanmalarında ilkin müdaxilələr, döş ağrılarının idarə olunması və s. mövzular üzrə iştirakçılara ətraflı məlumat veriblər.

Əsas məqsəd tibb işçilərinin bilik və bacarıqlarının təkmilləşdirilməsi olub.

İştirakçılar tərəfindən maraqla qarşılanan təlimdə tibb işçilərinin intensiv praktiki bacarıqlarını təkmilləşdirmək məqsədilə ən son protokollara cavab verən xüsusi tibbi avadanlıqlardan istifadə olunub.

Təlim mərkəzi adından xəstəxanaya və iştirakçılara xatirə hədiyyələri və sertifikatlar təqdim edilib.