Türkiyənin səhiyyə naziri Fahrettin Koca Təbii Fəlakət və Fövqəladə Hallar Agentliyinin (AFAD) Hataydakı Koordinasiya Mərkəzində çıxışı zamanı zəlzələdə yaralanan 21 min 859 nəfərin xəstəxanalarda müalicəsinin davam etdiyini bildirib. O, bölgədə və digər vilayətlərdə sağlamlıq imkanları baxımından heç bir problemin olmadığını söyləyib.

Aztibb.az-ın www.yenicaggazetesi.com.tr-yə istinadla xəbərinə görə, nazir ölkədə hələlik epidemiya təhlükəsinin olmadığını vurğulayıb.

F.Koca 13 mini həkim olmaqla 19 min nəfərin fəlakət bölgəsində xidmət etdiyini bildirib: "Səhiyyə Nazirliyinin rayon üzrə şəxsi heyətinin sayı təqribən 140 min nəfərdir. Başqa sözlə, nazirliyimizin təxminən hər 8 müvafiq personalından biri təbii fəlakət zonasındadır. Bu gün zəlzələ nəticəsində xəstəxanalara yerləşdirilən xəstələrin sayı 6 min 108-dir. Ümumi stasionar xəstələrin sayı 21 min 859-dur. Dünən evə buraxılan 1607 xəstə ilə birlikdə evə buraxılan xəstələrin ümumi sayı 13 min 612-dir. Təkcə dünən 902 cərrahi əməliyyat icra olunub. Zəlzələnin baş verdiyi ilk gündən həyata keçirilən əməliyyatların sayı isə 10 min 601-dir".