Körpə üçün ana südünün faydalarını bir daha xatırladaq. Çünki bəzi müasir analar var ki, hansısa səbəblərə görə körpələrini bu əvəzolunmaz qidadan məhrum edirlər. Bütün ana olmağa hazırlaşan və yeni ana olmuş xanımlar bilməlidirlər ki, ana südü körpələr üçün ən ideal qidalanmadır.

 

Aztibb.az xəbər verir ki, bu fikirləri Mingəçevir Şəhər Mərkəzi Xəstəxanasının Ginekologiya-doğum şöbəsinin Yeni Doğulmuşların İntensiv Terapiya bölməsinin həkim-neonatoloqu Azadə Əlişova ana südünün faydaları haqqında danışarkən bildirib.

 

Neonatoloqun sözlərinə görə, ana südü körpənin virus və bakteriyalarla mübarizə aparmasına kömək edən antitellərlə zəngindir və bu, xüsusilə ilk süd olan kolostruma aiddir. Kolostrum yüksək miqdarda immunnoqlobulin A (IgA), eləcə də bir sıra digər antitelləri təmin edir. Ananın orqanizmi viruslara və bakteriyalara məruz qaldığı zaman südə daxil olan antitellər sintez etməyə başlayır. IgA körpənin burnunda, boğazında və həzm sistemində qoruyucu təbəqə əmələ gətirərək uşağı xəstələnməkdən qoruyur.

 

Həkim bildirib ki, ana südü ilə qidalanmayan körpələr sətəlcəm, ishal və digər infeksiyalara daha həssasdırlar: "Körpələrimizin sağlam inkişaf etməsi üçün Tanrının onlara bəxş etdiyi ilk və mühüm qidalarından məhrum etməyin".